Artihkalgovva: cdd20 Pixabays

Guldal jietnabáddin:

Njukčamánu álggus munno gánddaš dohppii mu eahkedis gieđas ja savkilii: “Eadni, mun sávašin, ahte mii buohkat sáhtášeimmet leat ruovttus nu, ahte don it vuolgge.”

Son lea dál viđajahkásaš. Maŋimuš jagi áigge son lea hárjánan dasa, ahte mun lean vuolgán Mátta-Estteeatnamis Supmii, Helssegii bargui. Dahje hárjánan ja hárjánan, nie mun goit gádden, vaikko duollet dálle ledjen fuobmán su ahkitvuođa šaddat stuorisin, go lean eret su luhtte.

Figgen čiehkat dan, ahte su sánit čuhce mu váibmui. Celken goidadit: “Na-a, gal eadnige háliidivčče báhcit ruoktot, muhto eatni bargosadji lea eará sajis, ahte dilli lea dál dákkár.”

Duohtavuođas in livčče háliidan mihkkige nu olu, go báhcit suinna ruoktot dan sadjái, ahte juohke vahkku cealkit unna gánddažii “oaidnaleapmái ráhkis”, ja oaidnit su ganjaldeamen biillas lása duohken, go ieš lávkestan toga sisa.

Moadde maŋimuš mánu áigge ledjen guoibmásan muitalan, mo nuonddahallan lean johtit guovtti riikka gaskkas, ahte jus beare sáhtášin, bazašin Mátta-Estteeatnamii. Mo lean áibbašan dábálaš eallima gávpothušša haga, iežan eallima, man lean huksegoahtimin vieris riikii.

Avvila sturrosaš uhca válaštallangávpogaš Otepää Mátta-Estteeatnamis, buot máilmmi báikkiin, lea lodjudan mu dego unna rásáš bás prinssáža Asteroida B612-násttis Antoine de Saint-Exupéry girjjis.

Njukčamánu beallemuttus bođii diehtu, ahte Helssega universitehta giddáná miessemánu loahpa rádjai. Dat oaivvilda dan, ahte universitehtaárga stárte álbmaláhkai easkka čakčat.

Ledjen dalle Helssegis. Báhkkejin dakkáviđe iežan dutkangirjjálašvuođa fárrui ja fitnen dahkamin dearvvuođaid bargoskihpárii. Njuikejin dámpii, njuikejin bussii, mii doalvvui mu ruoktot.

Ruovttus gánddaš jearai, ahte guhkábat mun dán háve áigon leat ruovttus.

Mojohallen, danin go dihten, ahte bás gánddaš šaddá lihkolažžan das, go bođii áigi, bođii spiehkastatáigi, go ruovttus ii oktage rávkka: oaidnaleapmái.