Bures!

Jus sámeáššit geasuhit du ja dat čuhcet dutnje – dego munnje – de leat dádjadan rivttes siidduide!

Čállosiinnán háliidan guorahallat dihto beliid sámeservodagas ja juohkit iežan árgabeaivvi vásáhusaid ja fearániid duinna. Oainnat lean oalle árgi, ja munnje lea álkit čálligoahtit ja dien bokte oahpasmuvvat earáide, dutnje. Čállin lea munnje vuohki leat oktavuođas olbmuide, leat olbmuid siste. Jus náksen iežan čállosiiddánguin bohciidahttit dus dovdduid, de lean iežan mielas lihkostuvvan. Bloggačállin lea munnje goit ođđalágan buđaldeapmi, nuba lean easkka hárjehallamin.

Dáin siidduin čálán davvisáme- ja suomagillii. Figgán bidjat deike maid govaid, mat doaivumis beroštahttet. Sávan, ahte sáhtášin fállat dutnje oaidninčiega, man kánske it leat vel fáhtten.

Man somá oahpasmuvvat duinna!

Ja moadde eahperelevanta dieđu vel mu birra…

Lean fanáhtalaš…

… materiálaid sirremis. Buot máilmmi materiálat fertejit leat sirrejuvvon ja dolvojuvvon rivttes báikkiide: bioruskkát, garra pábir, dábálaš pábir ja bláđit, plastihka, geavahuvvon bahterat, boares dálkasat, ráigánan biktasat ja you name it. Eai leat gallis, geat nagodit muinna ássat ovttas, go figgán čuovvut ekologalaš árvvuid nu dárket, ahte olbmot mu birra seahkanit.

Go lean juhkaluvvan…

…hárve lean gal, muhto go lean, de lean gal ja lea somá. Liikon dalle dánsut! “Don’t leave the dance floor” munnje esttelaš arkkiteavttat čurvo, go ledjen dánsumin Riias, Latviijas. Čuovvovaš beaivve smihtten, ahte várra livččii gánnihan.

Go mus lea váivi…

…háliidan dalle leat ruovttus ja čorget. Ii gávdno moraš, masa čorgen ii veahkehivčče.  Eandalit skáhpiid vuđolaš ordnen addá dovddu, ahte visot lea ortnegis. Mus lea maid prinsihpa, ahte go juoidá váivviid lea geavvan, dan oažžu ovtta beaivvi moraštit, muhto čuovvovaš beaivve ii šat oaččo ášši guorahallat váivves mielain.

Ášši, man sihkkarit it diehtán mus…

Lean lohkan ruoššagiela nu olu, ahte mus galggašii leat das vuođđočehppodat (!). Vot tak!

Sámebeakkálmas, gii munnje lea eanemus čuohcán…

Inger-Mari Aikio aka Ima! Su divttat – ŠOŠ.

Jus fertešin geainnanu sápmelaččain náđđut giddagasas 24 diimmu, de vállješin skibirin…

…Johan Turi, dieđusge! Geanmat eará!

 

West_Helga_23 (640x426)
Govva: Mikko Mäntyniemi

 

Jus dutnje bođii dakkár dovdu, ahte moai sáhtášeimme áddehallat, de čális munnje Twitteras: “Bures!”

 

Dearvvuođaiguin,

@HelgaSofe